İyunun 13-də Lüksemburqda Amnesty International Luxembourg və Rosa Lëtzebuerg milli LGBTI assosiasiyasının dəstəyi ilə Azərbaycandakı LGBTQ+ icmasının vəziyyətinə həsr olunmuş tədbir təşkil edilib. Tədbirin təşəbbüskarları Aleks Şah və Esmiralda Wirtz olub.
Konfransın məqsədi Azərbaycanda LGBTQ+ insanların üzləşdiyi hüquqi və sosial problemlərə diqqət çəkmək, ölkədəki insan hüquqları vəziyyəti barədə məlumatlılığı artırmaq olub.
Tədbir çərçivəsində film nümayişi, ekspert çıxışları, təqdimatlar, sual-cavab sessiyası və drag performansı baş tutub. İnsan hüquqları aktivisti və jurnalist Həmidə Qiyasbəyli çıxış edərək öz təcrübələrini bölüşüb, eyni zamanda Azərbaycandakı LGBTQ+ insanların mövcud vəziyyəti barədə təqdimatla çıxış edib. İştirakçılara Azərbaycana aid müxtəlif məlumat və materiallar da təqdim olunub.
Konfrans zamanı Qıy Vaar! kollektivinin “KÖÇ” qısa sənədli filmi nümayiş etdirilib. Qürur ayı çərçivəsində təqdim olunan film Paris və Amsterdamda yaşayan azərbaycanlı LGBTQ+ şəxslərin həyat hekayələrini bir araya gətirir.
