May ayının əvvəllərində TikTok sosial şəbəkəsində 7 nəfərdən çox oğlanın 2 nəfərə hücum etdiyi görüntüsü paylaşılıb. “O. Verdiyev” ad və soyadlı istifadəçi adı ilə paylaşılan videodan görünür ki, çimərlikdə gəzən 2 nəfər feminin davranışına görə bir qrup insanın hücumuna məruz qalıb. Hücum edən şəxslərin kənardan görüntüləri sosial şəbəkə hesablarında paylaşılıb və zorakı insanlara tərif yazılıb.
Video bir neçə gün içərisində minlərlə bəyəni və homofob rəy alıb. İnsanların böyük bir qismi bu hücumu dəstəkləyib. Onlarla nifrət nitqi arasında zorakılığa və qətlə çağırış da yer alıb. Lakin video bir neçə gün sonra ilkin paylaşılan səhifədən silinib.
Azərbaycanda LGBTQ+ icması üçün heç bir təhlükəsiz məkan yoxdur. Bu cür zorakılıqlar bir-iki fərdi hadisə deyil, sistematik və davamlı şəkildə baş verir. Cəmiyyətin müəyyən hissəsi tərəfindən çəkilən və paylaşılaraq kuir insanların hədəfə çevrildiyi bu görüntülər, təkcə zorakılığın özünü deyil, həm də bu zorakılığı normallaşdıran, təşviq edən bir mühiti ortaya qoyur. Biz Qıy Vaar! platforması olaraq baş verən görüntülərdən narahatıq. Adiyyatı qurumları məsələ ilə bağlı hərəkətə keçməyə çağırırıq. Zərərçəkən yoldaşlarımız, əgər bu çağırışımızı görürsünüzsə, hüquqi dəstək almaq və birgə olmaq üçün bizimlə əlaqəyə keçin.
