Fransada ilk LGBTQ+ yaşlılar üçün nəzərdə tutulmuş yaşayış evi olan “Müxtəliflik Evi” (Maison de la Diversité) adlı layihə başlayır.
Lion şəhərində tarixi La Croix-Rousse məhəlləsində yerləşəcək bu evin rəsmi açılışı oktyabr ayında gözlənilir. İlk sakinlər avqustun sonundan etibarən mənzillərə yerləşməyə başlayacaqlar.
Layihə 2017-ci ildə qurulmuş “Les Audacieuses & Les Audacieux” assosiasiyasına məxsusdur və Berlinin “Lebensort Vielfalt” adlı oxşar təşəbbüsündən ilham alıb və bu sahədə Böyük Britaniya, Hollandiya, Danimarka kimi ölkələrin təcrübələrindən yararlanıb. Lion şəhərinin meri Qreqori Duset 2022-ci ildə layihənin təqdimatı zamanı: “Birinci Maison de la Diversiténin Lionda açılmasından böyük duyuruq.” – demişdi.
Ev əsasən 55 yaşdan yuxarı LGBTQ+lər üçün nəzərdə tutulsa da, gənclər və tələbələr üçün də bir mənzil ayrılacaq. Məqsəd müxtəlif nəsillər arasında əlaqəni gücləndirmək və diskriminasiyadan uzaq, təhlükəsiz mühit yaratmaqdır. Burada ümumilikdə 16 mənzil olacaq və 7 mənzil sosial ev statusunda olacağı üçün kirayə qiymətləri bazardan daha aşağı müəyyənləşdiriləcək.
Sakinlər birgə qərarlar verəcək
Layihənin koordinatoru Kristof Derkamp bildirir ki, sakinlər Les Audacieuses & Les Audacieux təşkilatına üzv olmalı və birgəyaşayış nizamnaməsini imzalamalıdırlar.
“Burada insanlar vəzifələri və resursları paylaşır, qərarları birgə verir və ictimai fəaliyyətlər təşkil edirlər.”
