Modern.az 20 sentyabr tarixində öz saytında “Cəmiyyət şokda: Gənclər arasında geylik artıb” başlıqlı müsahibə dərc edib. Lakin seçilmiş bu başlıq heç bir statistikaya və real faktlara əsaslanmır. O, açıq şəkildə cəmiyyətin böyük bir qisminin homofob və konservativ baxışlarını hədəfləyərək diqqət çəkmək və nifrəti artırmaq məqsədi daşıyır. Ən narahatedici məqam isə bu başlığın təsadüfi seçilməməsidir.
Azərbaycanda azad medianın sistemli şəkildə sıxışdırıldığı bir dövrdə, hökumət yönümlü media qurumları yalnız icazə verilən və diktə olunan mövzularla məşğul olur. Son illərdə isə bu cür mediada nifrət nitqi və ayrı-seçkilik açıq şəkildə artır. Bu, dövlət siyasətinin bir parçası kimi, bilərəkdən tirajlanır.
Modern.az-a görə “cəmiyyəti şoka salan hadisə” onlarla uşağın bir ay ərzində istismar edilməsi ilə bağlı xəbərlər, polis əməkdaşlarının uşaq təcavüzündə adlarının hallanması və ya müstəqil jurnalistlərin həbs olunması deyil. Onların diqqət mərkəzində gənclər arasında guya “geyliyin artması” dayanır.
Müsahibə isə uroloq-androloq Qardaşxan Məmmədovla aparılıb. O, homoseksuallığın artmasının səbəblərinin yalnız psixoloji deyil, həm də fiziki, hormonal və genetik amillərlə bağlı ola biləcəyini iddia edib. Onun sözlərinə görə, testosteronun azalması, qadın hormonlarının yüksəlməsi, xroniki xəstəliklər, artıq çəki və diabet bu vəziyyəti gücləndirir. Yəni, Məmmədovun arqumentinə əsaslansaq, diabet xəstəsi olmaq insanı “gey” edə bilər.
Həkim həmçinin sosial şəbəkələrdə mövzu ilə bağlı yayılan məzmunun gənclərin özünüifadəsinə təsir etdiyini bildirib və bunu “cəmiyyətin əxlaqi dəyərləri baxımından narahatedici hal” kimi təqdim edib. Lakin diqqətçəkən budur ki, Məmmədov üçün əxlaqsızlıq nümunəs uşaqlara qarşı təcavüz və zorakılıq deyil, insanların şəxsi həyatında kimlə necə cinsi münasibət qurmasıdır.
Müəllif: Ploretar Ördək
