Bakıda bir qızın dənizə atlayaraq intihar etməyə cəhd etdiyi iddia edilib. Sosial mediada yayılan videolara əsasən, hadisə avqustun 21-i gecə saatlarında baş verib. Xəbərlərdə iddia olunur ki, gənc qızın intihar cəhdinin səbəbi ailəsi tərəfindən məcburi evliliyə zorlanması olub. Hadisə Dənizkənarı Milli Park (Bulvar) ərazisində baş verib və qız mühafizəçilər tərəfindən xilas edilib.
Hadisə ilə bağlı sosial mediada daha ətraflı məlumat mövcud deyil. Videonun yayılmasına baxmayaraq, Prokurorluq tərəfindən məsələ ilə bağlı hər hansı bir araşdırmaya başlanılıb-başlanılmadığı məlum deyil və rəsmi açıqlama verilməyib.
Qeyd edək ki, Azərbaycan Cinayət Məcəlləsinin 125-ci maddəsinə əsasən (“özünü öldürmə həddinə çatdırma”) və 176.1-ci maddəsinə əsasən (“nikaha və ya erkən evliliyə məcbur etmə”) hər iki hal cinayət məsuliyyəti daşıyır.
