🗞️ BİR DƏQİQƏ, BALAM: bu dəfə gündəmimidə nələr var? Nəzər salaq.
– Azərbaycanda polis LGBTQİ+ icma üzvlərini aldadıcı zənglər və fırıldaq üsulları ilə izləməyə başlayıb. Onlara “hədiyyə qazanmısınız” və ya “bağlamanız var” kimi yalanlar deyilərək ünvanları öyrənilir, sonra isə həmin şəxslər polis bölməsinə aparılaraq rüşvət tələb olunub. Bu haqda 24 fevralda Minority Azerbaijan platforması xəbər verib. Bundan başqa, birbaşa zənglər və sosial şəbəkələrdə saxta tanışlıqlar vasitəsilə də icma üzvləri tələyə salınır. İnsan hüquqlarının kobud şəkildə pozulduğu bu halların artması LGBTQİ+ icmasının təhlükəsizliyini ciddi risk altına atır. Ekspertlər insanları ehtiyatlı olmağa və şəxsi məlumatlarını paylaşmamağa çağırır.
– Azərbaycanlı uşaq cərrahı Toğrul Ömərov 14 yaşlı interseks uşaq üzərində cinsiyyət dəyişdirmə əməliyyatı həyata keçirib. Bu cür əməliyyatlar, xüsusilə yetkinlik yaşına çatmamış şəxslərdə, BMT-nin “Uşaq Hüquqları Konvensiyası” və “Qadınlara Qarşı Ayrı-seçkiliyin Ləğv Edilməsi haqqında Konvensiya” (CEDAW) kimi beynəlxalq sənədlərə zidd hesab olunur. Avropa Şurası Parlament Assambleyası da interseks şəxslərin insan hüquqlarının qorunması və zərərli tibbi praktikalara son qoyulması üçün üzv dövlətləri tədbir görməyə çağırır. Bu əməliyyatın həyata keçirilməsi beynəlxalq hüquq normalarının pozulması kimi qiymətləndirilir.
– ABŞ-da trans icmasının üzvləri artan təhlükələrə qarşı silahlanmağa başlayıb. Trans qadın May Alejandro Rodriguez, Trampın yenidən seçilməsindən sonra özünü və icmasını qorumaq üçün ilk tapançasını alıb. O və dostları atıcılıq dərslərinə qatılaraq silahdan istifadə qaydalarını öyrənir. Son illərdə trans və qeyri-binari insanlara qarşı hücumlar və cinayətlər artdığı üçün bu icma silahlanmanı öz hüquqlarını qorumağın bir yolu kimi görür. ABŞ-da trans silah sahiblərinin sayı artır və bu, tarixi olaraq marginallaşmış qrupların özünümüdafiə üçün silahlanması ənənəsinə qoşulur.
Bəzən satirik, bəzən üsyankardır. 2021-ci ildən bəri LGBTQ-feminist gündəminin ardı ilə gedir.
