Türkiyədə LGBTİ+lərə qarşı yeni və genişmiqyaslı repressiya dalğası başlayıb. Kaos GL Dərnəyinə qarşı keçirilən polis əməliyyatında idarə heyətinin, o cümlədən təşkilat üzvlərinin evlərinə basqın edilib, 10-dan çox LGBTİ+ fəalı saxlanılıb. Polis dərnəyin ofisində də axtarış aparıb.
Əməliyyat Ankara Respublika Baş Prokurorluğunun İnformasiya Cinayətləri Bürosunun “müstehcenlik” (əxlaqsızlıq) və “QHT Qanununa zidd fəaliyyət” ittihamları üzrə apardığı istintaq çərçivəsində həyata keçirilib.
İstintaqda Kaos GL Dərnəyinin internet saytı və sosial media hesablarında yayımlanan məzmunlar əsas götürülüb. Ankara 4-cü Sülh Cəza Hakimliyinin 11 sentyabr 2026-cı il tarixli qərarında prokurorluq Kaos GL-nin internet saytı və sosial media hesablarında “müstehcenlik (əxlaqsızlıq) ehtiva edən paylaşımlar” yayımlandığını və bu məzmunların uşaqlar tərəfindən görülə biləcək şəkildə əlçatan olduğunu iddia edib.
Prokurorluq bu əsasla Türkiyə Cinayət Məcəlləsinin 226-cı maddəsində nəzərdə tutulan “müstehcenlik” cinayəti üzrə istintaq başladıb. İstintaq sənədlərində ittihama əsas gətirilən konkret məzmunların nədən ibarət olduğu göstərilməyib.
Dərnəyin rəsmi hesablarından istifadə edilməsi də istintaqa əsas gətirilib
Hakimlik qərarında istintaqa daxil edilən məzmunların Kaos GL Dərnəyinin fəaliyyəti çərçivəsində, təşkilatın rəsmi internet saytı və sosial media hesabları vasitəsilə yayımlanması da ayrıca əsaslandırma kimi göstərilib.
Prokurorluq paylaşımların dərnəyin fəaliyyəti çərçivəsində, rəsmi internet səhifələri və sosial media hesablarından istifadə edilməklə yayımlandığını irəli sürərək, məsələnin QHT Qanununa zidd fəaliyyət kimi də qiymətləndirilməsini tələb edib.
Qərarla istintaqa aid sübutların, fotoşəkillərin və çap materiallarının aşkar edilməsi halında onların müsadirə olunmasına icazə verilib. Hakimlik həmçinin şübhəlilərə aid masaüstü və noutbuk kompüterlər, mobil telefonlar, planşetlər, daşınan yaddaş qurğuları, CD və DVD-lər, eləcə də digər rəqəmsal materialların araşdırılmasına qərar verib.
Şifrələrin açıla bilməməsi və ya rəqəmsal məlumatlara çıxışın təmin olunmaması halında cihazların müsadirə edilməsinə də icazə verilib.
İstanbulda gecə klublarında da əməliyyat keçirilib
Kaos GL-yə qarşı polis əməliyyatı ilə eyni saatlarda İstanbulda da çoxsaylı məkanlara qarşı əməliyyat keçirilib.
İstanbul Respublika Baş Prokurorluğunun koordinasiyası ilə İstanbul İl Polis İdarəsi və İl Jandarma Komandanlığının əməkdaşları Beyoğlu və Şişlidə çoxsaylı məkanlara eyni vaxtda basqın edib.
Taksim, Cihangir və İstiqlal prospektində yerləşən gecə klubları və masaj salonları da daxil olmaqla bir sıra ünvanlarda axtarış aparılıb.
Kaos GL Dərnəyinə qarşı polis əməliyyatına dair sənəddə İstanbul Respublika Baş Prokurorluğunun həyata keçirdiyi bu əməliyyata da istinad edilib.
Əməliyyatlardan əvvəl LGBTİ+ təşkilat və fəalların hesabları bloklanmışdı
LGBTİ+lara qarşı repressiya polis əməliyyatlarından əvvəl də başlamışdı.
12 sentyabr hərbi çevrilişinin 46-cı ildönümündə LGBTİ+ təşkilatlarına və fəallarına məxsus çoxsaylı internet saytlarına və sosial media hesablarına Türkiyədən giriş məhdudlaşdırılıb.
Sayt və sosial media hesablarına giriş İstanbul 7-ci Sülh Cəza Hakimliyinin 12 sentyabr 2026-cı il tarixli qərarı əsasında məhdudlaşdırılıb.
Giriş məhdudiyyəti qərarlarının şənbə günü və iş saatlarından kənarda qəbul edilməsi diqqət çəkib. Rəqəmsal senzura tətbiqləri 1980-ci il hərbi çevrilişindən sonra LGBTİ+lara tətbiq edilən səhnə qadağalarını xatırladıb.
Bu ilin Qürur Ayında da çoxsaylı LGBTİ+ təşkilatlarının və fəallarının sosial media hesablarına giriş məhdudlaşdırılmış, bu qərarların arxasında “Sanal Devriye” tətbiqinin dayandığı ortaya çıxmışdı.
15 şəhərdə 162 şübhəli barədə hüquqi prosedur başladılıb
Səhər saatlarında Türkiyənin Ədliyyə naziri Akın Gürlekin açıqlamasına dair mətbuata yansıyan məlumatlara görə, İstanbul, Ankara, İzmir, Aydın və Mersin Respublika Baş Prokurorluqlarının koordinasiyası ilə həyata keçirilən “Ailəm Təhlükəsizdir” əməliyyatları çərçivəsində 15 şəhərdə 162 şübhəli, 9 dərnək və 13 müəssisə barəsində hüquqi prosedur başladılıb.
Sahədən əldə edilən son məlumatlara görə, 50-yə yaxın LGBTİ+ hüquq müdafiəçisi, dərnək rəhbəri və qurucusu, üzvü, keçmiş dərnək rəhbəri və müstəqil fəal saxlanılıb və ya onların barəsində ifadə və gözaltı prosedurları həyata keçirilib. Saxlanılanların dəqiq sayı, işlərin əhatə dairəsi və şəhərlər arasındakı əlaqələrə dair təsdiqləmə prosesi davam edir.
Türkiyədə son əməliyyatlarla birlikdə LGBTİ+ təşkilatlarına, fəallara və queer insanların bir araya gəldiyi məkanlara qarşı təzyiq daha da genişlənib.
