Meta şirkəti Messenger tətbiqindən trans və qeyri-binar mövzulu söhbət dizaynlarını (chat themes) silib. Bu dizaynlar 2021 və 2022-ci illərdə təqdim olunmuş, Qürur Ayı və Beynəlxalq Qeyri-Binar İnsanlar Gününə həsr edilmişdi. İndi onların ləğvi LGBTQ+ icmaları və həmrəy insanlarda ciddi narazılıq yaradıb.
Siyasət dəyişikliyinin bir hissəsi
Mövzuların silinməsi Meta-nın daha geniş siyasət dəyişikliyinin bir hissəsi kimi dəyərləndirilir. Şirkət son aylarda müxtəliflik, bərabərlik və inklüzivlik (DEI) proqramlarını dayandırıb və məzmun moderasiyası qaydalarını dəyişib. Ən çox tənqid olunan məqam isə budur: Artıq platformada LGBTQ+ləri cinsi oriyentasiya və ya gender kimliyinə görə “ruhi xəstə” adlandıran ifadələrə icazə verilir.
İnsan hüquqları müdafiəçiləri bu dəyişikliyi “təhlükəli geriyə addım” adlandırır. Onların sözlərinə görə, Meta-nın qərarları onlayn mühitdə zorakılığın və diskriminasiyanın artmasına səbəb ola bilər. LGBTQ+ fəallar bildirir ki, şirkətin əvvəlki illərdə atdığı inklüzivlik addımları icma üzvləri üçün həm görünürlük, həm də təhlükəsizlik baxımından mühüm rol oynayırdı.
Sosial şəbəkələrdə istifadəçilərdən mövzuya reaksiyalar isə müxtəlif olub. Bəziləri Metanı LGBTQ+ dəyərlərindən uzaqlaşmaqda və “qlobal mühafizəkar dalğalara boyun əyməkdə” günahlandırır. Digərləri isə bu addımı şirkətin maliyyə və siyasi təzyiqlər qarşısında güzəştə getməsi ilə əlaqələndirir.
Meta şirkəti isə hələlik məsələ ilə bağlı rəsmi açıqlama verməyib.
Meta dünyanın ən böyük sosial media şirkətlərindən biri olaraq milyardlarla insanın gündəlik onlayn ünsiyyətinə təsir göstərir. Şirkətin siyasətindəki dəyişikliklər yalnız estetik yeniliklərlə məhdudlaşmır, həssas qrupların rəqəmsal məkandakı mövqeyinə təsir göstərir.
