Moldova paytaxtı Kişinyovda yerli bələdiyyə LGBT yürüşləri və təbliğatını qadağan edən qərar qəbul edib. Bu addım şəhər meri İon Çeban tərəfindən elan olunub və ölkədə LGBTQ+ hüquqları uğrunda mübarizə aparan fəallar tərəfindən ciddi narahatlıqla qarşılanıb.
Qərarın qəbul olunduğu Kişinyov Bələdiyyə Şurasının iclasında Avropa İttifaqı yönümlü Hərəkət və Həmrəylik Partiyası (PAS) partiyasının üzvləri, etiraz əlaməti olaraq zalı tərk ediblər. Mer Çeban Telegram kanalında bildirib ki, “Kişinyov ərazisində yürüşlər, nümayişlər və LGBT təbliğatı qadağan edilib”.Bu addım, son illərdə LGBT tədbirləri zamanı baş verən qarşıdurmalar və cəmiyyətin müxtəlif təbəqələri arasında yaranan gərginliklər fonunda atılıb
Yerli LGBTQ+ təşkilatları, xüsusilə də GENDERDOC-M təşkilatı, bu addımı ifadə azadlığına və toplaşmaq hüququna açıq hücum kimi qiymətləndiriblər. Təşkilatın nümayəndəsi Angelica Frolov deyib: “Biz qorxmayacağıq və planlaşdırılan yürüşümüzü həyata keçirəcəyik.”
Son illərdə Moldova qanunvericiliyində müəyyən irəliləyişlər olub. Məsələn, seksual oriyentasiya əsasında ayrı-seçkilik artıq qanunsuz hesab olunurş Lakin eyni cinsli nikahlar və birgə övladlığa götürmə hələ də qanunla tanınmır. ILGA-Europe-un 2024-cü il hesabatında Moldova hökumətinə Avropa İnsan Haqları Məhkəməsinin qərarlarına uyğun şəkildə qanunvericiliyin təkmilləşdirilməsi tövsiyə olunur.
Hazırkı vəziyyət LGBTQ+ icmasının hüquqlarını və təhlükəsizliyini sual altına qoyur. Qadağaların artması, dövlət tərəfindən hüquqi olmayan ritorikaların yayılması, Moldovada insan hüquqları müdafiəçiləri üçün ciddi çağırışlar yaradır.
