Avstriyanı təmsil edən JJ (Johannes Pietsch), 2025-ci il Eurovision Mahnı Müsabiqəsinin qalibi olduqdan sonra verdiyi açıqlamada LGBTQ+ icmasına dəstək göstərmək məqsədilə səhnəyə Pride (göy qurşağı) bayrağını çıxarmağa cəhd etdiyini, lakin Avropa Yayım Birliyi (EBU) tərəfindən buna icazə verilmədiyini bildirib.
JJ, Göteborgda keçirilən final gecəsində “Wasted Love” adlı mahnı ilə 547 xal toplayaraq müsabiqənin qalibi olub. O yarışmanın qalibi olduqdan sonra, səhnə arxasında baş verən bir hadisəni ictimaiyyətlə bölüşüb:
“Bayrağı yanımda saxlayırdım. Cibimdə gizlətmişdim. Planım onu çıxışımın sonunda nümayiş etdirmək idi, çünki bu, mənim üçün və təmsil etdiyim insanlar üçün çox şey ifadə edir. Amma təşkilatçılar çıxışdan əvvəl bunu bilib məni dayandırdılar,” – deyə JJ PinkNews-a bildirib.
Yeni qaydalar və senzura tənqidi
Bu hadisə Eurovision müsabiqəsində qəbul edilmiş yeni qaydalar fonunda baş verir. 2025-ci ildən etibarən EBU tərəfindən tətbiq olunan yeni protokollara əsasən, səhnə çıxışları və digər rəsmi tədbirlər zamanı yalnız iştirakçı ölkələrin rəsmi bayraqlarının qaldıra bilər. Bu qərar, bir çox LGBTQ+ fəalları və insan haqları müdafiəçiləri tərəfindən ifadə azadlığına və inklüzivliyə zidd hesab olunur.
JJ, müsabiqədəki iştirakını sadəcə musiqi ilə məhdudlaşdırmaq istəmədiyini bildirib:
“Eurovision hər zaman müxtəlifliyin, sevgilərin və azadlığın səhnəsi olub. Mən LGBTQ+ olaraq, bu sahədəki dəyişikliyi narahatedici hesab edirəm. İfa etdiyim ‘Wasted Love’ mahnısı da məhz itirilmiş sevgilərin, rədd edilmiş kimliklərin və görünməz qalanların hekayəsidir.”
JJ-in müsabiqədən sonra verdiyi bu açıqlama sosial şəbəkələrdə və mediada rezonans doğurub. Bir çox Eurovision izləyicisi və fəallar bu cəhdə görə müğənniyə dəstək ifadə edib. Sosial mediada “#LetUsWave” və “#PrideOnStage” kimi həştəqlərlə yeni qadağaya qarşı çağırışlar yayılıb.
İnsan haqları təşkilatları, o cümlədən ILGA-Europe və Amnesty International, EBU-nun bu mövqeyini sərt şəkildə tənqid edərək, müsabiqənin əsl ruhuna və tarixçəsinə zidd olduğunu bildiriblər.
Avropa Yayım Birliyi isə məsələ ilə bağlı hələlik rəsmi açıqlama verməyib. Lakin təşkilat daha öncə qaydalarla bağlı verdiyi bəyanatlarda bu cür məhdudiyyətlərin “siyasi neytrallığın qorunması” məqsədi daşıdığını bildirib. JJ isə bu arqumentə belə cavab verib:
“İnsan haqları siyasət deyil. İnsanlar sevgisini və kimliyini qeyd etdikdə bu, siyasi aksiya hesab edilə bilməz. Mən sadəcə görünməyənlər üçün görünmək istədim.”
