Almaniyanın Xarici İşlər Nazirliyi trans və qeyri-binar vətəndaşlara ABŞ-a səfər edərkən çətinliklərlə üzləşə biləcəkləri barədə xəbərdarlıq verib.
ABŞ Prezidenti Donald Trampın imzaladığı yeni sərəncama əsasən, yalnız “kişi” və ya “qadın” cinsiyyət nişanına malik pasportlar etibarlı sayılacaq. Bu qərar, trans şəxsiyyətini hüquqi çərçivədən tamamilə silir və doğumda təyin edilən cinsiyyətdən fərqli gender kimliyini tanımaqdan imtina edir.Bu qayda təkcə ABŞ vətəndaşlarına deyil, ölkəyə daxil olmaq istəyən bütün ziyarətçilərə də şamil edilir. Alman Xarici İşlər Nazirliyi xəbərdarlıq edərək bildirib ki, müvəqqəti viza almaq istəyən şəxslər özlərini yalnız “kişi” və ya “qadın” kimi qeyd etməlidirlər. Eyni zamanda, pasportunda “X” nişanı olan və ya doğumda təyin edilən cinsiyyəti ilə gender kimliyi uyğun gəlməyən şəxslərə ABŞ-a səfər etməzdən əvvəl müvafiq qurumlarla əlaqə saxlayaraq giriş qaydaları barədə ətraflı məlumat almaq tövsiyə olunub.
Bu xəbərdarlıq, ABŞ-ın dövlət katibi Marko Rubionun bütün viza müraciətçilərinin doğumda təyin edilən cinsiyyətlərini qeyd etməsini tələb edən yeni direktivindən sonra verilib.
Rubionun təlimatına əsasən, viza ərizəsində göstərilən cinsiyyət doğumda təyin edilən cinsiyyətdən fərqlənərsə, şəxs “kimlik saxtakarlığı” və “yanlış məlumat vermə” ittihamı ilə geri qaytarıla bilər. Hətta bu səbəbdən həmin şəxslərin ABŞ-a ömürlük girişinin qadağan edilməsi də mümkündür.
Bundan əlavə, ABŞ Dövlət Departamenti son vaxtlar öz rəsmi beynəlxalq səyahət məsləhət səhifəsindən translara dair demək olar ki, bütün istinadları silib. İndi həmin səhifədə yalnız LGB-lərə yönəlmiş xəbərdarlıqlar qalır.
